Д витамин

Д аминдэмийн талаарх мэдээлэлтэй танилцаарай

Витамин Д нь биед амин чухал үүрэг гүйцэтгэдэг даавар бөгөөд дархлааны тогтолцооны үйл ажиллагаа, дааврын тэнцвэрт байдал, ясны бат бөх байдалд чухал нөлөөтэй. Энэ витамин нь голдуу нарны гэрлийн тусгалаар арьсанд нийлэгждэг бөгөөд мөн тодорхой хэмжээгээр хоол хүнсээр дамжин биед шингэдэг.

Нарны тусгалтай харьцах хугацаа:

Монгол орны өргөрөгт, витамин Д-ийг их хэмжээгээр авах боломж зөвхөн 3-10 дугаар сарын хооронд, өдрийн 11-15 цагийн үед бий болдог. Гэвч ажил, амьдралын хэв маягаас шалтгаалан ихэнх хүмүүс энэ цаг үед наранд гарах боломж хомс байдаг.

Арьсаа нарны хэт ягаан туяанаас хамгаалахын тулд нарны тос хэрэглэх, урт ханцуйтай цамц, өмд өмсөх зэрэг нь витамин Д-ийн нийлэгжилтийг бууруулдаг. Тиймээс витамин Д ялгаруулахын тулд арьсаа тодорхой хугацаагаар наранд гаргах нь чухал юм. Гэхдээ нарны хэт ягаан туяа нь арьсыг эрт хөгшрүүлэх, арьсны хорт хавдар үүсгэх эрсдэлтэй байдаг.

Витамин Д-ийн ялгаруулалтанд нөлөөлөх хүчин зүйлс:

Арьсны төрөл, нас зэрэг хүчин зүйлсээс хамааран витамин Д-ийн ялгаруулалт харилцан адилгүй байдаг. Нас ахих тусам арьс нимгэрч, витамин Д нийлэгжүүлэх чадвар буурдаг. Харин арьсны өнгө бор байх тусам витамин Д хангалттай хэмжээгээр ялгаруулахын тулд илүү удаан хугацаагаар нарны туяанд байх шаардлагатай болдог. Жирэмсэн үед витамин Д-ийн хэрэгцээ ургийн өсөлтийг дэмжихийн тулд нэмэгддэг.

Эцэст нь:

Дээрх мэдээлэлд үндэслэн, та зуны улиралд витамин Д-ийн нэмэлт тэжээл хэрэглэх эсэхээ амьдралын хэв маягтайгаа уялдуулан шийдээрэй. Илүү нарийвчилсан үр дүн мэдэхийг хүсвэл цусаар витамин Д-ийн түвшин тодорхойлуулах шинжилгээ өгөхийг зөвлөж байна.